ادارہ بتول

پون صدی کی درخشندہ روایت

ادارہ بتول

پون صدی کی درخشندہ روایت

یہی ہوتا ہے خاندان میں کیا! – بتول مارچ ۲۰۲۳

اللہ نے نسل انسانی کی بقا کے لیے عورت مرد کے جوڑے بنائے۔ عورت معاشرے کا ستون، خاندان کا مرکز محبت اور قوم کا دھڑکتا دل ہے عورت اور مرد نوع انسانی کے دو اہم جزوہیں اور مل کر معاشرہ کی بنا ڈالتے ہیں اللہ نے ان دونوں میں ایک دوسرے کے لیے انتہائی کشش رکھی تاکہ وہ ایک دوسرے کی طرف راغب ہوں۔ محسن انسانیت رسول اکرم صلی اللہ علیہ وسلم نے فرمایا ۔
مجھے تمہاری دنیا میں سے تین چیزیں زیادہ پسند ہیں۔عورت، خوشبو اور نماز۔
میاں بیوی خاندان کی بنیاد رکھتے ہیں اور خاندان معاشرے کی اہم و بنیادی اکائی و اولین ادارہ ہے۔ خوشگوار خاندان خوشگوار معاشرے کو جنم دیتا ہے خوشگوار شادی دنیوی جنت ہے اور ناخوشگوار شادی جہنم۔ گھر کی تعمیر کے بغیر معاشرہ کی تعمیر نہیں ہو سکتی گھریلو ز زندگی حقوق و فرائض کا مجموعہ ہے،ایک ایسا گھر جہاں کے افراد آپس میں جو حقوق و فرائض ا اور خلوص و محبت، ایثار و قربانی کے اعلیٰ ترین قلبی احساسات اور جذبات کی مضبوط ڈوریوں سے بندھے ہوں آئیڈیل گھر کہلا تا ہے ۔تحمل، برداشت، صبر، عفو و درگزر جیسی صفات سے مزین زوجین اعلیٰ اخلاق کے حامل بن جاتے ہیں جن کی شادی شدہ عملی زندگی میں اختلافات نہ ہونے کے برابر رہ جاتے ہیں۔اسلام کی تعلیم ہی یہی ہے کہ عورت گھر کو راحت کدہ اور مرکز سکون بنا ئے تاکہ مرد گھر میں ذہنی سکون و اطمینان پا سکے ۔مگر اب وقت کے ساتھ ساتھ تبدیلیاں آنے لگی ہیں وہ گھر جو پہلے محبت کا قلعہ تھا نفسیاتی حصار تھاتھا جذباتی اور سماجی زندگی کی ڈھال تھا اب صرف افراداد کا مجموعہ بن گیا ہے بقول جون ایلیاؔ:
ٹوکتا کیوں نہیں کوئی مجھ کو
یہی ہوتا ہے خاندان میں کیا
بے شک ٹوکنا تو منفی رویہ ہے مگر اس منفی رویے میں مثبت عمل بھی پوشیدہ ہے کہ ٹوکا اسی کو جاتا ہے جس سے اپنا ئیت کا تعلق ہوتا ہے۔ نہ ٹوکنے سے قربت ختم ہو جاتی ہے ایک ہی گھر میں رہتے ہوئے فاصلے بڑھ جاتے ہیں، ہر کوئی اپنے خول میں بند ایک دوسرے سے بے نیاز ہو جاتا ہے۔ لیکن اس ٹوکنے و نصیحت کرنے میں مثبت رویہ بہت ضروری ہے۔ مثبت سوچ ا ور مثبت رویہ ایک دوسرے کے معاملات کو جوڑ کر قربت پیدا کرتا ہے ۔ پہلے لوگ دور رہ کر بھی نزدیک تھے اور آج قریب رہ کر بھی ایک دوسرے سے دور ہو چکے ہیں۔
قوم کی تعمیر کے لیے فرد کی تعمیر ضروری ہے،قوم افراد تیار نہیں کرتی بلکہ افراد کے ہاتھوں میں قوم کی تعمیر ہوتی ہے اور فرد و مستحکم معاشرے کی تعمیر کے لیے خاندان کا ادارہ بہت ضروری ہے اسلام میں خاندان کے تصور کی بہت اہمیت ہے،نکاح کو آپ ﷺ نے نصف دین قرار دیا،زوجین اور پھر بچوں کی صور ت میں خاندان کی تشکیل کی گئی اور بچوں کی پیدائش و پرورش کا درجہ بلند کر کے عظیم نعمت سے جوڑ دیا اورتعلق رب کو خاندان کے مستحکم و پائیدار ہونے کی علامت قرار دیا۔ جب تک رب سے تعلق برقرار رہے گا خاندان مستحکم رہے گا ،اس کے بغیر خاندان کا ادارہ انتشار کا شکار ہو جائے گا ۔
قرآن علم و حکمت کا منبع جو مکمل دستور حیات عطا کرتا ہے، عورت اور مرد کی جسمانی ساخت کے تقاضوں کے مطابق ان سے توقع لگاتا ہے۔ مرد کو قوام بنا کر اس کا رتبہ و درجہ عورت سے بلند کرتا ہے جب کہ عورت کو ماں بہن بیوی و بیٹی کے روپ میں صنف نازک قرار دے کر عورت کوباہر کی ذمہ داریوں سے بری قرار دیتا ہے۔لیکن موجودہ دور میں مساوات مرد و زن کے نعرے نے عورت کو ہر طرح کی ذمہ داریوں خاندانی روایات و بندھنوں سے آزادی کی سوچ عطا کر دی ہے،اورحقوق

قرآن علم و حکمت کا منبع جو مکمل دستور حیات عطا کرتا ہے، عورت اور مرد کی جسمانی ساخت کے تقاضوں کے مطابق ان سے توقع لگاتا ہے۔ مرد کو قوام بنا کر اس کا رتبہ و درجہ عورت سے بلند کرتا ہے جب کہ عورت کو ماں بہن بیوی و بیٹی کے روپ میں صنف نازک قرار دے کر عورت کوباہر کی ذمہ داریوں سے بری قرار دیتا ہے۔لیکن موجودہ دور میں مساوات مرد و زن کے نعرے نے عورت کو ہر طرح کی ذمہ داریوں خاندانی روایات و بندھنوں سے آزادی کی سوچ عطا کر دی ہے،اورحقوق نسواں کے نام پر عورت کو اس کے دائرہ کار گھر اور خاندان سے کنارہ کش کر دیا ہے اب عورت اپنی فطری ذمہ داریوں سے آزاد ہونا چاہ رہی ہے، خاندان کا کوئی قوام نہیں، کسی کو کسی پر کوئی فضیلت نہیں، عورت کی اس بے لگام آزدی کا پس منظر کیا ہے ذرا سوچیں کہیں عورتوں کے حقوق تو پامال نہیں کیے جارہے؟ حالانکہ اسلام نے تو عورت کے شرف و وقار کو بحال کیا ہے، یہودیت اور عیسائیت کے نزدیک عورت گناہ کی جڑ تھی ،ہندو مت میں عورت کو پست ذلیل و حقیر سمجھا جاتا رہا او ر شوہر کی چتا کے ساتھ عورت کو بھی جلا دینے کا رواج رہا، ، ہندو معاشرت اور قانون میں عورت کے لیے معاشی و تمدنی میدان میں کوئی حصہ نہیں، معیشیت میں کوئی حصہ نہیں، عمل و فکر کی قطعا ًآزادی نہیں، جدید مغربی عورت کو آزادی دی گئی، مگر اس مادر پدر آزادی نے عورت کو محض دل بستگی کا ذریعہ بنا دیا۔قبل اسلام بیٹیوں کو زندہ جلا دیا جاتا رہا ، لکھنے پڑھنے سے محروم رکھا جاتا رہا ، قحبہ خانوں کی زینت بنائی جاتی رہی۔صرف اسلام ہی نے عورت کو انسانی اور سماجی حقوق عطا کیے، اسے وراثت کا حقدار ٹھہرایا، عملا ًحق مہر دلوایا۔ نازک آبگینے کہہ کر نرمی و در گذر کی تاکید کی، انتخاب رفیق کا حق دیا اور ماں بہن بیوی اور بیٹی کے روپ میں مجموعی طور پر وہ وہ شرف و وقار اور تحفظ عطا کیا جس کی نظیر کہیں نہیں ملتی۔
اصل المیہ یہ کہ اسلام نے عورت کو قرآن و سنت کے جن اصولوں پر عمل پیرا ہونے کی تلقین کی تھی، دور حاضر کی عورت نے ان کی نفی کر کے بے حجاب ہو کر اپنے آپ کو پھر سے دور جاہلیت کی طرح مظلوم و محروم اور مرد کے لیے کھلونا بنا دیا، عورتوں کے لیے حجاب رب کا حکم ہے اور معاشرہ کو پاک صاف رکھنے کا عملی ذریعہ بھی ہے۔ اسلام نے عورت اور مرد کو بحیثیت انسان بنیادی انسانی حقوق میں مساوات عطا فرمائی، مرد و خواتین دونوں ہی کے لیے ایک ہی نظام عقائد ہے، دونوں ہی کے جنت میں مقیم رہنے،لغزش کھانے اور دونوں کے زمین پر بھیجے جانے اور دونوں ہی کی جانب سے توبہ قبول کیے جانے کے احوال یکساں ہیں، اخلاقی لحاظ سے دونوں میں مساوات ہے، یعنی فضائل اخلاق اور رذائل اخلاق کی راہیں ایک جیسی ہیں، نیکی اور بدی کا بدلہ یکساں ہے، اور دونوں میں سے جو جتنا تقویٰ میں بڑھ جائے مرتبہ پاسکتا ہے۔ حلال و حرام کی قیود بھی دونوں کے لیے یکساں مقرر ہیں۔ نیز دونوں کے ساتھ عدل و انصاف کے قوانین بھی یکساں ہیں ۔
لیکن اللہ کی اس کائناتی تقسیم میں مرد اپنی جگہ ذمہ دار ہیں اور عورت اپنی جگہ۔ عورت قیمتی خزانہ ہے گھر اور خاندان کا اہم ستون عورت ہے، وہ گھر گھر نہیں جہاں عورت نہیں، جب بھی کسی آئیڈیل گھر کا تصور ذہن میں آتا ہے تو پہلی تصویر اس پرسکون گھر کی ابھرتی ہے جہاں ہر کام ایک جادوئی میکنزم کے تحت شیڈول کے مطابق ہوتا نظر آتا ہے۔ مرد کو کسب معاش کا ذمہ دار بنا کر بیرون خانہ کے تمام کام تجارت، زراعت،صنعت و حرفت، معیشت، فوجی دفاع سونپ دیا گیا، تمام سخت بھاری اور مشقت کے کام مرد کے ذمہ ڈالے گئے اور عورت کو شمع حرم بنا کر آئندہ نسل کی تخلیق، پرورش،کفالت تربیت و جملہ خانہ داری کے فرائض سونپے گئے۔ دراصل عورت کی بنیادی ذمہ داری گھر کی فضاکو سنوارنا ہے، گھر بنانا ہے گھر توڑنا یا بگاڑنا نہیں ہے، اسلام میں مرد و زن کوئی حریف یا مخالف جنس نہیں،نہ ان میں کوئی معرکہ کار زار گرم ہے، نہ ہی مردوں کی بے جا حمایت ہے اور نہ ہی عورتوں کا استحصا ل ہے بلکہ رب کائنات کے نزدیک تمام عورتیں اور مرد من حیث الانسان برابر ہیں اور مقصد اسلامی و آئیڈیل معاشرے کی تخلیق ہے ۔وہ اللہ جو تمام مخلوقات کا خا لق ہے ستر ماؤں سے بڑھ کر چاہنے والی ذات،کیا وہ ہی نہیں جانے گاکہ اس کی مخلوق کے لیے کیا بہتر ہے۔
عورت گھر کی مالکہ ہے ، ماں کی گود ہی بچے کی پہلی درسگاہ ہے، شوہر کا خیال رکھنا اس کو کسب معاش کے لیے گھر سے سکون و راحت فراہم کرنا بچوں کو اچھے باشعور بنا کر قوم کے مستقبل کو سنوارنا ہی ماں کا اصل ہدف ہے، بڑے بڑے بزرگ ولی اللہ،نبی ولی شہید سب ما ں ہی کی تربیت کا نمونہ بن کر ابھرے، اسلام ماں کے قدموں تلے جنت کہہ کر عورت کو خیر کی بنیاد قرار دیتا ہے،، نکاح کے ذریعے عورت کو محصنات قرار دے کر باعزت مقام عطا کرتا ہے جبکہ مغربی معاشرے سے مستعار لیے گئے مساوات مرد و زن کے پر کشش نعروں اور سرمایہ داروں کی چال نے آج کی عورت کو امن و سلامتی کے حصار سے نکال کر اپنے ہی ملک اپنے ہی شہر اور اپنے ہی محلے میں غنڈہ ازم کا شکار بنا دیا ہے۔ گجرات کا سانحہ، گوجرانوالہ، چشتیاں، زینب سمیت نہ جانے کتنی ہی معصوم بچیوں کے اغوا و تشدد، ہماری اخلاقیات، ہمارا قانون ہمارے حکمران ان سب کے دامن پر یہ ایسے داغ ہیں جن کو کسی پانی سے نہیں دھویا جا سکتا۔ بہ نسبت دور اسلامی کا سعادت والا زمانہ، جہاں عورت اپنی عصمت کے ساتھ محفوظ تھی۔ دور جدید کا المیہ کہ شہر شہر عورت کی عریاں تصاویر نے ماحول کو آلودگی سے پرکر دیا ہے، عورت کے نسوانی وقار کو تار تار کر کے اس کو صرف مال بیچنے کی جنس بنا دیا۔ عورت اپنے اوپر ہونے والے استحصال پر نوحہ کناں کہ اسے آزادی چاہیے۔ یہ انقلاب دور جاہلیت کی طرف لوٹائے جانے کا انقلاب ہے جبکہ اسلامی انقلاب دین کے صحیح ایمان و شعور سے پیدا ہوتا ہے۔

اسلام کے معاشرتی قوانین کا فیض ہے کہ زوجین میں بے حد محبت ہوتی ہے اور وہ ایک دوسرے پر جان دیتے ہیں۔بطور بیوی کے حضرت خدیجہؓ کا کردار سب خواتین کے لیے مشعل راہ ہے، جنہوں نے نہ صرف قبول اسلام میں سبقت کی بلکہ بار نبوت کو اٹھاتے وقت آنحضور ﷺ کے کانپتے دل کو تسلی دی،ان کی ڈھارس بندھائی،پھر اپنا مال، اپنا دل و دماغ، اپنے غور و فکر کی پوری قوت،اپنی ہمدردیاں، جانثاریاں سب حضور پاک ؐ کی محبت میں آپ کی ذات مبارک پر نچھا ور کر دیں۔تمام امہات المومنین تمام صحابیات،راہ حق میں اپنے مردوں کی ڈھارس بندھانے والی،گھریلو پریشانیوں سے ان کو نجات دلا کر بیرونی فرائض کے لیے ان کو زیادہ سے زیادہ وقت و سکون مہیا کرنے والی، ان کو حرام سے بچا کر حلال کمائی پر قناعت کرنے والی، ہر تنگی ترشی میں انہیں اپنی غمگساری،ہمدردی اور تعاون کا یقین دلانے والی اور پورے خلوص و جانثاری سے ان کی اطاعت اورخدمت بجا لانے والی تھیں، اپنے شوہر کی خوشنودی پر جان دیتی تھیں۔حقیقت تو یہ ہے کہ بغیر محبت و اطاعت کے رشتہ نکاح ایک جسد بے روح ہے اور یہ بھی حقیقت ہے کہ روئے زمین پر جتنے بھی مسلمانوں نے کارنامے انجام دیے، ان میں بیویوں کی تر غیب و تحریص کو بہت دخل ہوتاتھا ۔الغرض گھر عورت کی واحد پناہ گاہ ہے اور دور جدید کے مساوات مرد و زن اور ترقی نسواں کے نعرے شیطان کے حربے ہیں جن سے بچ کر ہی عورت نہ صرف اپنے حقوق حاصل کر سکتی ہے بلکہ تحفظ و عزت بھی پا سکتی ہے۔
٭٭٭

:شیئر کریں

Share on facebook
Share on twitter
Share on whatsapp
Share on linkedin
0 0 vote
Article Rating
Subscribe
Notify of
guest
0 Comments
Inline Feedbacks
View all comments
0
Would love your thoughts, please comment.x
()
x